Kaliforniýa ştatynda kömürturşy gazyny (CO2) tutup almak we ony ýeriň astynda uzak wagtlaýyn saklamak boýunça ilkinji senagat kärhanasy — «Carbon TerraVault I» işe başlady.
Bu taslamany California Resources Corporation kompaniýasynyň düzümindäki «Carbon TerraVault» bölümi durmuşa geçirýär. Desga Kern okrugynyň Elk Hills ýatagynda, Beýkersfildden takmynan 30 kilometr uzaklykda ýerleşýär. Ilkinji CO2 gysyp guýmak işi şu aý başlandy.
Kömürturşy gazy 1,5 kilometrden gowrak çuňlukda ýerleşýän, nebiti we gazy tükenen 26R gatlagynda saklanar. Mundan öň ABŞ-nyň Daşky gurşawy goramak baradaky agentligi kompaniýa kömürturşy gazyny ýerastynda saklamak üçin guýulary ulanmaga niýetlenen «Class VI» rugsatnamasyny beripdi.
Taslama dört sany guýynyň burawlanmagyny göz öňünde tutýar. Ýylda takmynan 1,5 million tonna kömürturşy gazyny gysyp guýmak meýilleşdirilýär. Taslamanyň hasaplanan iş möhleti 26 ýyl bolup, saklanyljak gazyň umumy göwrümi tas 38 million tonna CO2-ä barabar bolar diýlip çaklanylýar.
Birinji tapgyrda ýeriň astyna şol ýatakda nebit we gaz çykarylýan wagty emele gelýän kömürturşy gazy gysylyp guýlar. Geljekde bolsa bu ýere beýleki senagat zyňyndylarynyň çeşmeleri hem birikdirilip bilner.
Kompaniýa Kaliforniýada ýene-de sekiz sany şeýle saklaw nokadyny döretmek üçin arza tabşyrdy. Olaryň umumy sygymlylygy takmynan 352 million tonna CO2 bolmagy mümkin.
