Nanorobotlar beýniniň anewrizmalaryny bejermek, insultyň öňüni almak üçin ulanylyp bilner. Barlag Small žurnalynda çap edildi. Awtorlaryň biri, Edinburg uniwersitetiniň bioinženeri Çi Çžou Live Science-e beren interwýusynda taslama barada gysgaça gürrüň berdi.
Ol tehnologiýanyň uky arteriýalarynda emeli anewrizmalary döredip, towşanlarda synag edilendigini mälim etdi. Synag astyndaky üç haýwan üstünlikli bejerildi. Nanorobotlaryň adam öýjükleri bilen bioylalaşyjylygy häzirlikçe diňe laboratoriýa şertlerinde synagdan geçirildi.
Nanorobotlaryň diametri 295 nanometr bolup, magnit ýadrosyndan, trombinden we gyzdyrylanda eräp gidýän gabykdan durýar. Olar magnit meýdanynyň kömegi bilen anewrizma eltilýär we beden dokumalaryna zeper ýetirmezden, dermany goýberýär.
Çi Çžouwyň sözlerine görä, usulyň howpsuzlygyny we netijeliligini uzak möhletleýin öwrenmek üçin adamlara has meňzeş fiziologiýasy bolan haýwanlarda synaglary dowam etdirmeli.
Anewrizmalaryň stentler we tegekler ulanylyp bejerilýän adaty usuly gaýtadan döremek töwekgelçiligini döredýär we uzak wagtlap derman kabul edip gezmegi talap edýär.
