Amerikaly alymlar kollembolanyň (Collembola) özboluşly aýratynlyklaryny wideo düşürmegi başardylar. Bu jandarlar hereket etmek we käwagt ýyrtyjylardan goranmak üçin howada “akrobatiki etýudlary” ýerine ýetirip, ajaýyp tizlik we takyklyk bilen adaty bolmadyk böküşleri edýärler.
Bu kiçi bognaýaklylar sekuntda 368 öwrüm tizliginde howada pyrlanyp bilýärler. Ylma belli haýwanlaryň hiç biri-de şeýle ukyba eýe däldir.
Kollembola bökmek üçin ýörite organ ulanýar. Ol aşa tizlik bilen ýazylýan furkasynyň berýän bady bilen, özüni 50 santimetre çenli beýiklige zyňýar.
Bu ajaýyp başarnyklar, biolog Adrian Smitiň we bioinžener Jeýkob Harrisonyň ünsüni çekdi. Olar Dicyrtomina minuta görnüşiniň hereketleriniň dinamikasyny öwrenmek üçin sanly ýokary tizlikli kameralary ulandylar.
Alymlar alnan maglumatlaryň çylşyrymly we bökmäge ukyply robotlaryň işlenip düzülmegine kömek eder diýip umyt edýärler. Şeýle robotlar halas ediş işlerinde we howply we barmasy kyn ýerlerde gözleg geçirmekde ulanylyp bilner. Gözlegiň netijeleri Integrative Organismal Biology žurnalynda çap edildi.
