29-njy awgustda Aşgabatda «TAPI Pipeline Company Limited» kompaniýasynyň direktorlar geňeşiniň mejlisi geçirildi. Onda Türkmenistan - Owganystan - Pakistan - Hindistan (TOPH) gaz geçirijisiniň taslamasyny durmuşa geçirmegiň ileri tutulýan ugurlary maslahatlaşyldy. Bu barada Türkmenistan Habarlar Portaly habar berýär.
Mejlisiň barşynda şeýle hem ýurduň ýangyç-energetika toplumyny ösdürmegiň geljegi ara alnyp maslahatlaşyldy.
Bellenilişi ýaly, Türkmenistany, Owganystany, Pakistany we Hindistany birleşdirýän TOPH taslamasy eksport mümkinçiliklerini giňeltmekde we sebitde energetika howpsuzlygyny üpjün etmekde strategiki orun eýeleýär.
Duşuşyga gatnaşyjylar taslamanyň üstünde netijeli işleri dowam etdirmegiň we gaz geçirijiniň gurluşygynyň ähli tapgyrlarynyň üstünlikli tamamlanmagy üçin göz öňünde tutulan çäreleri durmuşa geçirmegiň möhümligini bellediler.
Öň, habar berşimiz ýaly, häzirki wagtda Owganystanyň Magdan we nebit önümleri ministriniň wezipesini ýerine ýetiriji H.Badriniň ýolbaşçylygyndaky wekiliýet agzalary ýurdumyzda saparda bolýar.
