26-njy awgustda Mejlisiň Başlygy D.Gulmanowa Kamboja Patyşalygynyň Türkmenistandaky Adatdan daşary we Doly ygtyýarly ilçisi (oturýan ýeri Ankara ş.) Sok Çeadan ynanç hatyny kabul etdi. Bu barada Türkmenistanyň Mejlisiniň saýtynda habar berilýär.
Parlamentiň ýolbaşçysy Türkmenistanyň Prezidentiniň adyndan Sok Çeany jogapkärli wezipä bellenilmegi bilen gutlady hem-de diplomatik işinde üstünlikleri arzuw etdi.
Duşuşygyň dowamynda taraplar ikitaraplaýyn hyzmatdaşlygy ösdürmegiň geljegini ara alyp maslahatlaşdylar. Ilçi Mejlisiň düzümi we alyp barýan işi, Türkmenistanda durmuşa geçirilýän durmuş-ykdysady, demokratik özgertmeleriň kanunçylyk-hukuk binýadyny üpjün etmekdäki orny bilen tanyşdyryldy.
Şunuň bilen baglylykda, taraplar parlament ugry boýunça Türkmenistan bilen Kamboja Patyşalygynyň arasynda hyzmatdaşlygy ýola goýmagyň mümkinçiliklerine garadylar.
Şol gün Kamboja Patyşalygynyň Türkmenistandaky ilçisi Sok Çea şeýle hem Türkmenistanyň daşary işler ministriniň orunbasary Mähri Bäşimowa bilen duşuşdy.
Taraplar söwda-ykdysady hyzmatdaşlygy, hususan-da, bilelikdäki işewür forumlaryny we sergileri guramak arkaly ýola goýmagyň ýollaryny ara alyp maslahatlaşdylar.
