2024-nji ýylyň 16–19-njy awgust aralygynda türkmen ýaşlar wekiliýeti Russiýa Federasiýasynyň Burýatiýa Respublikasynyň Baýkal kölüniň kenarynda geçirilen Baýkal ýaşlar forumyna gatnaşdy. Wekiliýetiň düzümine Türkmenistanyň Magtymguly adyndaky ýaşlar guramasynyň we üç sany ýokary okuw mekdebiniň wekilleri girdi diýip, "Türkmenistan: Altyn asyr" elektron neşiri habar berýär.
Forumyň esasy mowzugy - «Durnukly ösüş maksatlary» bolup, oňa Russiýanyň ýedi sebitinden we dünýäniň 13 ýurdundan 300-e golaý ýaşlar gatnaşdy. Olaryň hatarynda ýaşlar jemgyýetçilik guramalarynyň ýolbaşçylary we işjeňleri, ýaş döwlet we ýerli häkimiýet gullukçylary, talyplar, döredijilik hünärleriniň wekilleri we telekeçiler bar.
Üç günüň dowamynda halkara ýaşlar toparlary watançylyk, meýletinlik, medeniýet we sungat, metbugat we dolandyryş ýaly bäş dürli ugurda iş alyp bardy.
Baýkal ýaşlar forumy işjeň we zehinli ýaşlar jemgyýetiniň emele gelmegine, döwlet ýaşlar syýasatynyň häzirki meselelerini çözmäge gatnaşmagyna, bilelikdäki taslamalary durmuşa geçirmekde hyzmatdaşlyk etjek halkara ýaşlar toparlarynyň arasyndaky gatnaşyklary pugtalandyrmaga, şeýle hem dürli ugurlarda üstünlik gazanan ýaşlaryň ygtyýarlyklaryny ösdürmäge ýardam etmek maksady bilen döredildi.
