Geçen hepdede Türkmenistandan we beýleki Merkezi Aziýa ýurtlaryndan oftalmolog-bilermenler HHR-de Sianda ýerleşýän "Eyedeal Medical Technology Co., Ltd." kompaniýasyna baryp gördüler. Bu sapar Halk Respublikasynyň Saglygy goraýyş milli komissiýasynyň Halkara tejribe alyş we hyzmatdaşlyk merkeziniň çakylygy boýunça amala aşyryldy diýip, Orient agentligi habar berýär.
Merkezi Aziýaly hünärmenler barlaglar, oftalmologiýa enjamlarynyň we esbaplarynyň işläp taýýarlamalary we öndürilişi bilen meşgullanýan ýokary tehnologiýaly kärhananyň işi bilen ýakyndan tanşyp, täze materiallaryň we innowasiýalaryň işläp taýýarlamalarynda soňky gazananlar barada maglumat aldylar.
Hünärmenler ýokary takykly lukmançylyk desgalarynyň artykmaçlyklaryna we hiline ýokary baha berip, degişli önümleriň aýratynlygynyň öwredilişi babatynda ylmy barlagçylar bilen gatnaşyklaryň ýola goýulmagyna gyzyklanma bildirdiler.
Saparyň çäklerinde kompaniýa içerki ynsanperwer maksatnamasynda we “Bir guşak – bir ýol” ýurtlarynda ulanmagyň çäklerinde Hytaýyň "Health Express Foundation" gaznasyna 5000 ýokary netijeli intraokulýar linzalaryny mugt gowşurjakdygy barada aýdyp geçdi. Intraokulýar linzalaryň bu tapgyry katarakta keselinde mugt operasiýalaryň geçirilmeginde ulanylar. Bu bolsa Hytaýda we daşary ýurtlarda köpsanly näsaglara göz görüjiligini dikeltmäge mümkinçilik berer.
