Kanadadaky Britaniýan Kolumbiýasy uniwersitetiniň alymlary özüne düşýän ýagtylygyň 99%-den gowragyny siňdirýän täze şar gara agaç materialyny döretdiler. "Nxylon" diýlip atlandyrylan bu material agajyň suwy itekleýji häsiýetini ýokarlandyrmaga gönükdirilen, ýokary energiýa plazmasy bilen geçirilen synaglaryň dowamynda tötänden alnypdyr diýip, Phys.org habar berýär.
Nxylon ýagtylygyň, takmynan, 97,5%-ni siňdirýän adaty gara reňkdenem has ýokarydyr. Bu astronomiýada ulanmak üçin iň oňat material bolar, bu ýerde aşa gara örtük pytraňňy ýagtylygy azaltmaga we teleskoplarda şekiliň hilini ýokarlandyrmaga kömek edýär.
Şeýle-de, Nxylon Gün panelleriniň netijeliligini ýokarlandyrmakda, şaý-seplerde we kaşaň harytlary döretmekde hem ulanylyp bilner. Material ýagtylygyň çykmagynyň öňüni alýan özboluşly gurluşa eýedir. Bu altyn bilen örtülen ýagdaýynda-da oňa gara reňkini saklamaga mümkinçilik berýär.
Barlagçylar häzirki wagtda sagat we şaý-sepler ýaly, Nxylon esasly täjirçilik önümleriň prototiplerini taýýarlaýarlar. Şeýle hem olar önümçiligi giňeltmek we materialy dürli ugurlara ornaşdyrmak üçin başlangyç döretmegi meýilleşdirýärler.
