Hytaýyň Çžeszýan tebigy taryhy muzeýiniň paleontologlary tirannozawryň täze görnüşini tapdylar diýip, Phys.org ýazýar.
Gazylyp alnan galyndylar Guançžou şäherindäki gurluşyk meýdançasynda tapyldy. Täze görnüşe Aziýa yklymynyň adyndan we latynça tyrannus – “zalym, patyşa” sözünden gelip çykýan Asiatyrannus xui ady berildi.
Gözleg topary tapyndynyň kelleçanagyny, oňurgasynyň bir bölegini, arka aýaklarynyň we guýrugynyň süňküni gözden geçirdi. Dinozawryň kelleçanagynyň uzynlygy 47,5 sm, bedeniniň umumy uzynlygy 3,5-4 metre deňdir.
Galyndylar 66–72 million ýyl mundan ozal, giçki Mel döwrüne degişlidir. A. xui beýleki has uly tirannozawrlardan uzyn ýüzi we bedeniniň beýleki bölekleri bilen tapawutlanýar. Gözlegçileriň aýtmagyna görä, bu dinozawr aýratyn ekologiki ýeri tutup, has kiçi we has çalt iýmit bilen iýmitlenipdir.
Tapyndy, tirannozawridleriň Laramidiýadan Hytaýyň günortasyna ozal pikir edilişinden has giç göçüp gelendikleri baradaky teoriýalary goldaýar. Häzirki Demirgazyk Amerikanyň günbatar kenarýakasynda ýerleşen Laramidiýa adasy, tirannozawr nesiliniň gelip çykyş çeşmesi hasaplanýar.
