Gazagystanyň Akmola oblastynda bürünç eýýamyna degişli adamyň ýüz keşbi bolan daş heýkeli tapyldy. Bu açyş barada Arkeonews portaly habar berdi.
Bu tapyndy Sandyktau obasyndaky ýerli ýangyn gullugynyň işgärleri tarapyndan tötänleýin tapyldy. Heýkel sebitdäki adatdan daşary ýagdaýlar bölüminiň goragy astyna alyndy. Ony öwrenmek üçin Astanadan we daşary ýurtlardan arheologlar çagyryldy.
Alkey Margulan Arheologiýa Institutynyň işgäri Sergeý Ýarygin şuňa meňzeş ýadygärlikleriň bürünç eýýamynda Merkezi Aziýa we Gündogar Ýewropa sebitlerinde ýerleşendigini belläp geçýär.
Daşdaky ýüzüň döredilmeginiň takyk senesi entek kesgitlenmedi. Alymlar onuň dürli döwürlerde, şol sanda has soňraky döwürde oýulyp bilnendigini aýdýarlar. Bu heýkeli öwrenmek Gazagystanyň çägindäki gadymy siwilizasiýalary, olaryň ýaşaýyş durmuşyny, medeniýetini we ynançlaryny açyp görkezip biler.
