NASA adamlaryň Marsa geljekki uçuşlarynyň taýýarlygyna gönükdirilen Gyzyl planetadaky ýaşaýşy imitirlemek boýunça bir ýyl dowam eden tejribesini tamamlady. Bu barada BBC habar berýär.
10 müň dalaşgärden saýlanan dört meýletinçi “Mars blogunda” – geljekki kolonistleriň Marsda ýaşaýyş şertlerini modelirleýän, meýdany 160 inedördül metr bolan tejribe toplumynda bir ýyl boldular. Olaryň missiýasy 2023-nji ýylyň 25-nji iýunynda başlady.
Tejribäniň dowamynda NASA serişde tarapdan çäklendirilen izolýasiýada astronawtlaryň ýaşaýşynyň psihologiki taraplaryny öwrendi. Meýletinçiler dürli kynçylykdan, şol sanda Ýer bilen aragatnaşygyň gijikme şertlerinden hem baş alyp çykmaly boldular. Ekipaž radio arkaly soragyň jogabyna ýarym sagat töweregi garaşmaly bolýandygy üçin, ýüze çykýan meseleleri özbaşdak çözmeli boldy.
Tejribä gatnaşyjylar “Ýerden alnan” konserwler bilen iýmitlendiler, şeýle-de kiçiräk ýyladyşhanada gök önümleri we gök otlary ösdürip ýetişdirdiler, bu hem suwdan we beýleki zerur çeşmelerden seresaply peýdalanmagy talap edýärdi.
Mundan başga-da, astronawlar “Mars gurşawynyň” elementlerini modelirlemek üçin 3D çap usulyny ulandylar. Alymlar 3D çap ediş Gyzyl planetadaky çägäni ulanyp, geljekki Mars koloniýalaryny gurmagyň açary bolup biler diýip hasaplaýarlar.
“Mars blogunyň” tejribesi Marsy üstünlikli özleşdirer ýaly zerur tehnologiýalary we strategiýalary işläp taýýarlamak üçin gymmatly maglumatlary berdi.
