4-nji iýulda Tokioda “Merkezi Aziýa – Ýaponiýa” işewürler dialogynyň ikinji duşuşygy geçirildi. Çärä sebitiň ýurtlarynyň ilçileri we Ýaponiýanyň işewür toparlarynyň wekilleri gatnaşdy.
Russiýa we täze garaşsyz döwletler bilen söwda boýunça ýapon assosiasiýasynyň (ROTOBO) howandarlygynda geçirilen duşuşygyň dowamynda söwda-ykdysady gatnaşyklary ösdürmek meseleleri ara alnyp maslahatlaşyldy.
Merkezi Aziýa ýurtlarynyň ilçileri Ýaponiýa bilen hyzmatdaşlygyň häzirki ýagdaýyna baha berdiler hem-de ileri tutulýan ugurlary we ýapon kompaniýalary üçin mümkinçilikleri bellediler. Şu ýylyň awgust aýynda Astanada geçirilmegi meýilleşdirilýän “Merkezi Aziýa – Ýaponiýa” dialogynyň döwlet Baştutanlarynyň birinji sammitine aýratyn üns berildi. Öň, Ýaponiýanyň premýer-ministri Fumio Kisidanyň bu sammite gatnaşjakdygy tassyklandy.
Çäräniň çäklerinde ýaponiýaly işewürleriň, şol sanda Mitsui & Co., Marubeni we ITOCHU kompaniýalarynyň wekilleriniň çykyşlary boldy. Duşuşygyň ahyrynda taraplar söwda-ykdysady gatnaşyklary berkitmäge ygrarlydyklaryny tassyklap, Bilelikdäki beýannama gol çekdiler.
