Saud Arabystany ägirt uly taslamalary bilen dünýäni haýran galdyrmagyny dowam edýär. Patyşalyk bu gezek dünýäniň iň uly merjen bagyny döretmegi meýilleşdirýär.
Şuşa taslamasy Şa Abdullah adyndaky Ylym we Tehnologiýalar Uniwersiteti hem-de NEOM çäkleri ösdürmek gullugy bilen bilelikde durmuşa geçiriler. Ol diňe bir barlaglar merkezini däl, eýsem ajaýyp suwasty merjen gaýalar bagyny hem öz içine alýar.
Bagyň gapdalynda kaşaň myhmanhanalar, willalar, suwa düşülýän kenar we muzeý gurlar. Taslama Amerikanyň Gensle binagärlik studiýasy tarapyndan işlenip taýýarlanýar.
Munuň özi Saud Arabystanynyň soňky ýyllarda durmuşa geçiren ilkinji mega taslamasy däldigini bellemelidiris. Mundan ozal patyşalygyň çölüň ortasynda akwapark, ägirt uly asma howuz we dünýäniň iň uly howa menzilini gurmak baradaky meýilnamalarynyň bardygyny aýdyp geçipdik.
