Türkmenistan Ýewraziýa patent guramasynyň esasy resminamalarynyň biri bolan “Ýewraziýa patent Konwensiýasynyň senagat nusgalaryny goramak hakyndaky Teswirnamasyna” goşulmagy meýilleşdirýär. Degişli teklibi 14-nji iýunda Hökümet mejlisiniň barşynda wise-premýer, daşary işler ministri R.Meredow hödürledi.
Şunuň bilen baglylykda, wise-premýer, daşary işler ministri ýokarda agzalan Teswirnama goşulmak bilen şertlendirilen ýurdumyz üçin dörejek artykmaçlyklar barada habar berdi.
Şeýle hem Türkmenistanyň abraýly halkara guramalarynda, hususan-da, Ýewraziýa patent guramasynda wekilçiligini giňeltmek boýunça teklip beýan edildi.
Mundan başga-da, şu ýylyň oktýabr aýynda Aşgabat şäherinde senagat nusgalarynyň hukuk goragyna bagyşlanan sebitleýin maslahaty, 2025-nji ýylda bolsa, Ýewraziýa patent guramasynyň Dolandyryjy geňeşiniň nobatdaky mejlisini geçirmek teklip edilýär.
Serdar Berdimuhamedow beýan edilen teklipleri goldady hem-de wise-premýere, daşary işler ministrine Ýewraziýa patent guramasy bilen ýola goýlan hyzmatdaşlygy mundan beýläk-de pugtalandyrmak boýunça degişli işleri geçirmegi tabşyrdy.
