Uzak wagtlap žiraflaryň boýunlarynyň uzynlygy ýokardaky ýapraklara ýetmäge, şeýle hem erkek žiraflara bäsdeşleri bilen göreşmäge gerekligi bilen baglanyşdyrylýardy. Uzyn we güýçli boýunlaryň ejiz boýunly garşydaşlaryny urkaçy žiraflaryň ýanyndan kowmaga mümkinçilik berýändigi öňe sürüldi, bu bolsa olara ata-babalaryndan şol bir beden gurluşyny miras aljak nesilleri galdyrmaga has uly mümkinçilikleriň bardygyny aňladýar.
Şeýle-de bolsa, Mammalian Biology ylmy žurnalynda çap edilen täze barlag alternatiw nazaryýeti teklip edýär.
Alymlar ýabany tebigatdaky we haýwanat baglaryndaky žiraflaryň beden gurluşyny öwrendiler we urkaçy žiraflaryň boýnunyň erkek žiraflaryňka garanyňda uzyn bolýandygyny anykladylar. Ene žiraflaryň bedeni hem taýlarynyňkydan birneme uzyn. Barlagçylaryň pikirine görä, bu tapawutlar ene žiraflaryň göwrelilik döwründe olaryň özleriniň we çagalarynyň iýmite talaplarynyň artmagy bilen baglanyşyklydyr.
Pensilwaniýa uniwersitetiniň biologiýa boýunça professory we barlagyň awtorlarynyň biri Duglas Kawener: "Žiraflaryň uzyn boýnunyň ewolýusiýasy, esasan, enelik döwründe iýmite bolan talap bilen baglanyşykly hasaplaýarys" –diýip belleýär.
Uzyn boý urkaçy žiraflara agaçlaryň başyndaky iň ýokumly ýapraklara ýetmäge mümkinçilik berýär. Şeýlelik bilen, uzyn boýun ýaşamak we köpelmek üçin hökmany zerurlyga öwrülip, soňra miras galypdyr.
Erkek žiraflaryň boýnunyň has giňdigini bellemelidiris, ol urkaçy žiraflar ugrundaky göreşde garşydaşynyň urgusyna has berk durmak üçin zerur.
