Naked Science-iň berýän habaryna görä, Daniýada geçirilen synag göwrelilik döwründe wegan berhiziniň çaga düwünçegine ýaramaz täsir edip biljekdigini anyklady.
Acta Obstetricia Et Gynecologica Scandinavica” žurnalynda çap edilen gözlegiň netijesine görä, wegan berhizini tutýan eneleriň bäbekleriniň agramy kem (ortaça 240 gram) bolup, olar, köplenç, preeklampsiýadan ejir çekýärler. Wegan berhizli aýallarda göwrelilik 5,2 gün uzak dowam edýär we düwünçek has haýal ösýär.
Gözleg 1996-2002-nji ýyllar aralygynda 66 müňden gowrak göwreli aýal baradaky maglumatlara esaslandy. Gözlege gatnaşanlaryň 0,03%-i wegan berhizini tutýardy.
Alymlar olaryň kynçylygyny beloklaryň az kabul edilmegi bilen baglanyşdyrýarlar. Süýt, ýumurtga ýa-da balyk iýen göwreli aýallar hiç hili ýaramaz täsiri başdan geçirmediler.
Wegan berhiziniň täze doglan bäbekleriň agramyna täsiri çilim çekmegiň täsiri bilen deň görülýär. Şeýle-de bolsa, gözlege wegan berhizli aýallaryň az sanlysynyň gatnaşanlygy sebäpli, netijeler bu ýagdaýyň köpräk öwrenilmegini talap edýär.
Alymlar göwreli aýallary nutriýenler çäklendirilen iýmitleri saýlanda seresap bolmaga çagyrdylar. Enäniň we çaganyň saglygyny goramak üçin ýokumly maddalaryň deňagramlylygyny saklamak möhümdir.
