Özbegistanyň Prezidenti Şawkat Mirziýoýew Türkmenistanyň Prezidenti Serdar Berdimuhamedowy hem-de Türkmenistanyň dostlukly halkyny mübärek Oraza aýynyň ýetip gelmegi mynasybetli gutlady.
Özbek Lideriniň haty türkmen metbugatynda çep edildi.
Şawkat Mirziýoýew hatynda "bu mukaddes aý taryhynyň, diliniň, dininiň, medeniýetiniň umumylygy bilen baglanyşan özbek hem-de türkmen halklarynda aýratyn ruhubelentlik duýgusyny döredýär" diýip belleýär.
"Özbek we türkmen halklarynyň arasynda asyrlaryň dowamynda kemala gelen dostluk, özara düşünişmek, hoşniýetli goňşuçylyk gatnaşyklarynyň bilelikdäki tagallalarymyzyň hem-de syýasy erkimiziň netijesinde gün-günden pugtalandyrylýandygy guwandyryjydyr. Soňky ýyllarda ýokary derejedäki işjeň syýasy dialogymyzyň, gazanylan möhüm ylalaşyklaryň strategik hyzmatdaşlygymyzy hil taýdan täze derejä çykarmaga ýardam berjekdigine we doganlyk halklarymyzyň abadançylyk derejesini has-da ýokarlandyrmaga mynasyp goşant goşjakdygyna berk ynanýaryn" diýlip hatda aýdylýar.
