Türkmenistanyň Belarusdaky ilçisi Nazarguly Şagulyýew Türkiýe Respublikasynyň Minskidäki täze ilçisi Güýçlü Jem Yşyk bilen duşuşdy. Duşuşyk 5-nji fewralda türkmen ilçihanasynyň binasynda türk tarapynyň başlangyjy boýunça geçirildi.
Taraplar söwda-ykdysady, bilim, medeni-ynsanperwer ugurlardaky özara gatnaşyklary ara alyp maslahatlaşdylar. Duşuşykda döwletara gatnaşyklarynyň ýokary depgindäki ösüşiniň, şeýle hem iki ýurduň umumy taryhyna, diline, dinine we medeniýetine esaslanýan ikitaraplaýyn hyzmatdaşlygyň giň mümkinçilikleriniň, çeşmeleriniň we geljeginiň bardygy nygtaldy. Bu barada Türkmenistanyň diplomatik wekilhanasy habar berdi.
Nazarguly Şagulyýew türk kärdeşine 2024-nji ýylyň “Pähim-paýhas ummany Magtymguly Pyragy” şygary bilen geçirilýändigini habar berdi. Şunuň bilen baglylykda, ýurtda we daşary ýurtlarda beýik türkmen şahyrynyň we akyldarynyň 300 ýyllygyna bagyşlanan dürli çäreler geçirilýär.
Şeýle hem TÜRKSOÝ-yň çäginde 2024-nji ýylyň Magtymguly Pyragynyň ýyly diýip yglan edilmegi we Türkmenistanyň Änew şäheriniň şu ýyl türki dünýäsiniň medeni paýtagty diýlip ykrar edilmegi barada pikir alşyldy. Şunuň bilen baglylykda, Türkmenistanda Türki medeniýetiň halkara guramasynyň birnäçe çäreleri, şol sanda däp bolan çäreler geçiriler.
Duşuşygyň ahyrynda N.Şagulyýew myhmana Türkmenistanyň Prezidenti Serdar Berdimuhamedowyň ýaşlaryň ýurduň ykdysady, syýasy we medeni durmuşyna işjeň gatnaşmagyna gönükdirilen döwlet Baştutany tarapyndan alnyp barylýan ýaşlar syýasatyna bagyşlanan “Ýaşlar - Watanyň daýanjy” atly ilkinji kitabyny sowgat berdi.
