Türkmenistanyň Ýaponiýadaky ilçisi Atadurdy Baýramowyň ABŞ-ly kärdeşi Ramo Emanuel bilen geçiren gepleşiklerinde iki ýurduň arasynda hyzmatdaşlyk meseleleri, şeýle hem “Merkezi Aziýa+ABŞ” görnüşindäki dialogyň netijeliligi maslahatlaşyldy. Bu barada Türkmenistanyň Tokio şäherindäki ilçihanasy habar berdi.
Geçen ýylyň sentýabr aýynda geçirilen ýokary derejeli “Merkezi Aziýa+ABŞ” duşuşygynyň çäklerinde döwletleriň arasynda sebit howpsuzlygy, söwda, aragatnaşyk, şeýle hem howanyň üýtgemegine garşy göreşmek babatdaky meseleleri maslahatlaşmak üçin amatly mümkinçiligiň bolandygy bellenildi. Bellenişi ýaly, bu formatdaky hyzmatdaşlyk degişli ugurlarda özara gatnaşyklary pugtalandyrmak üçin oňyn gural bolup hyzmat edýär.
Diplomatlar iki ýurduň ykdysady hyzmatdaşlygy, häzirki döwrüň wehimlerine we howanyň üýtgemegine garşy göreşmek ulgamlarynda ikitaraplaýyn gatnaşyklary ösdürmäge ygrarlydyklaryny bellediler.
