Hytaýdan alymlar Türkmenistana geldiler. Dekabr aýynyň ahyrynda ýurduň ylmy jemgyýetçiliginiň wekilleri üçin Garagumyň tebigy ýerlerine gezelenç guraldy diýip, “Neýtralnyý Türkmenistan” gazeti habar berýär.
Ýurdumyza gelen hünärmenleriň arasynda Sinszýanyň Ekologiýa we geografiýa institutynyň hem-de onuň Beýik Ýüpek ýoly üçin ýaşyl ösüş gözleg merkeziniň, şeýle-de Hytaýyň Ylymlar Akademiýasynyň Geologiýa we geofizika institutynyň, Hytaýyň Ylymlar akademiýasynyň beýleki ylmy edaralarynyň işgärleri bardy.
Alymlar Daşky gurşawy goramak ministrliginden we ýurdumyzyň Suw hojalygy baradaky döwlet komitetinden, olaryň ylmy bölümlerinden, şol sanda Çöller, ösümlik we haýwanat dünýäsi milli institutyndan (ÇÖHDMI) türkmen kärdeşleri bilen duşuşdylar.
Hytaýly myhmanlar üçin Garagum çölüniň jümmüşine gezelenç guraldy. Şeýle-de, olar Bokurdak şäherçesine baryp, bu ýeriň tebigaty, ösümlik köpdürlüligi bilen tanyşdylar.
Türkmen kärdeşleri bilen duşuşygyň dowamynda hytaýly wekiller Türkmenistanyň çöl öwreniş ylmynyň potensialyna ýokary baha berdiler we çölleşmä, ýerleriň zaýalanmagyna garşy göreşiň netijeliligini ýokarlandyrmak, biodürlüligi gorap saklamak üçin ylmy hyzmatdaşlyga gyzyklanma bildirdiler.
