Tesla-nyň hytaýly bäsdeşi Nio elektrik ulaglary üçin 1000 km aralyga hereket etmäge ýetýän batareýa öndürdi. Onuň synag sürülişi Hytaýyň iki şäheriniň arasynda bir zarýadda 14 sagat sürmek bilen kompaniýanyň baş direktory tarapyndan amala aşyryldy diýip, Business Insider ýazýar.
Nio-nyň "Hytaýyň Ilon Masky" ady bilen meşhurlyk gazanan baş direktory Uilýam Li Hytaýyň elektrik ulag kompaniýasynyň öňdebaryjy batareýa tehnologiýasy synag edip, Şanhaýdan Sýamene çenli geçen 1044 km ýoluny göni ýaýlymda görkezdi.
Li Hytaýyň Weibo sosial media sahypasynda Nio ET7 elektrik awtoulagynyň, sebitde howanyň birden sowandygyna garamazdan, 14 sagatlyk ýoly bir zarýad bilen tamamlap bilendigini we ýoly 3% batareýa zarýady bilen tamamlandygyny habar berdi.
ET7 Nio-nyň 150 kWt sagatlyk batareýasy bilen üpjün edildi, Li-niň aýtmagyna görä, ol dünýädäki islendik EV batareýasyndan iň ýokary energiýa dykyzlygy bilen tapawutlanyp, oňa has uzak aralygy geçmäge mümkinçilik berýär. Nio 2024-nji ýylyň aprelinde şeýle batareýalary köpçülikleýin öndürip başlamagy meýilleşdirýär. Şeýle-de bolsa, ol arzan düşmeýär, sebäbi kompaniýanyň aýtmagyna görä, batareýany aýratyn satyn almak 298 000 ýuana (42,1 müň dollar) töweregi bolar - bu Hytaýdaky Tesla Model Y-nyň bahasy bilen deňdir.
