4-nji ýanwarda günüň ikinji ýarymynda BAE-niň Prezidentiniň «Al Şatiýe» köşgünde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Birleşen Arap Emirlikleriniň Prezidenti Şeýh Mohammed Bin Zaýed Al Nahaýýan bilen duşuşygy boldy.
Duşuşyga BAE-niň wise-prezidenti, Ministrler Kabinetiniň Başlygynyň orunbasary, Prezidentiň iş dolandyryş ministri Mansur Bin Zaýed Al-Nahaýýan gatnaşdy.
Birleşen Arap Emirlikleri biziň dostumyzdyr, ygtybarly ykdysady we söwda hyzmatdaşymyzdyr, şeýle hem häzirki döwrüň köp sanly örän möhüm soraglaryny çözmekde pikirdeşimizdir diýip, türkmen halkynyň Milli Lideri Gurbanguly Berdimuhamedow nygtady.
Şeýh Mohammed Bin Zaýed Al Nahaýýan Türkmenistan bilen BAE-niň arasynda ikitaraplaýyn we köptaraplaýyn esasda ýola goýlan hyzmatdaşlygyň netijeli häsiýete eýedigini nygtap, ýurdumyzyň öňe sürýän, durnukly we ählumumy ösüşe gönükdirilen ähli başlangyçlaryny goldaýandygyny aýtdy.
Duşuşygyň dowamynda söhbetdeşler taraplaryň iki döwletiň we olaryň doganlyk halklarynyň bähbidine däp bolan gatnaşyklary ösdürmäge mundan beýläk-de uly üns bermäge meýillidigini tassykladylar.
Taraplar dünýäde bolup geçýän häzirki ýagdaýlara garamazdan, türkmen-emirlikler söwda-ykdysady gatnaşyklarynyň durnukly we artýan depgin bilen ösýändigini kanagatlanma bilen bellediler.
Medeni-ynsanperwer ulgamda, ylym, medeniýet we sport ugurlary boýunça ýola goýlan döwletara gatnaşyklary pugtalandyrmagyň wajypdygyna aýratyn üns berildi.
