BSGG-niň Ýewropa sebit býurosy Stambulda Türkmenistandan, Azerbaýjandan we Gazagystandan saglygy goraýyş pudagynyň işgärleri üçin wirtual hakykat gurallaryny ulanmak bilen 4 günlük trening geçirdi. Bu barada nCa habar berýär.
Treningiň dowamynda BSGG-niň Ýewropa Sebit býurosynyň wekilleri port lukmançylyk işgärleriniň toparyny portlarda we gämilerde jemgyýetçilik saglygy goraýyş potensialyny ýokarlandyrmaga mümkinçilik berjek täze sanly çözgütler bilen tanyşdyrdylar.
Koronawirus pandemiýasy portlarda jemgyýetiň saglygyny goramak potensialyny saklamagyň örän möhümdigini görkezdi. Indi olaryň işiniň gaýtadan dikeldilmegi bilen köp ýurtlar üçin taýýarlykly port lukmançylyk işgärlerine zerurlyk hem artdy. Bu faktorlary göz öňünde tutup, BSGG gämileriň sanitariýa barlagy ugrunda bilim ülňülerini ýokarlandyrjak täze wirtual hakykat (VR) gurallaryny işläp taýýarlady we hödürledi. Taslama ulanyjylara düýpli sanitariýa barlagyny üpjün etmek üçin gäminiň tehniki zonalarynyň hakyky şekillendirişi bilen tanyşmaga mümkinçilik berýär.
Gatnaşyjylar wirtual hakykatda gäminiň içinden geçmäge mümkinçilik berýän VR garnituralaryny we el kontrollerlerini synap gördüler. Modelirleme ulanyjylara gäminiň toplumlaýyn sanitariýa barlagyny geçirmegi, şol sanda töwekgelçiliklere baha bermek işlerini geçirmegi we kapitan hem topar bilen nähili aragatnaşyk saklamalydygyny öwrenmäge kömek edýär.
Türkiýede geçirilen dört günlük trening howa menzillerinde, portlarda we ýerüsti transport merkezlerinde potensialy artdyrmak boýunça BSGG-niň Ýewropa Sebit býurosy tarapyndan goldanylýan hem-de sebitde serhetleriň ýagdaýyny gowulandyrmaga gönükdirilen çäreleriň bir bölegi boldy.
