Bütindünýä saglygy goraýyş guramasy (BSGG) Kongo Demokratik Respublikasynda we Ugandada Ebola gyzzyrmasynyň ýaýramagyny jemgyýetçilik saglygy goraýyş ulgamynda halkara ähmiýetli adatdan daşary ýagdaý diýip yglan etdi. Bu iki ýurtda kesellemegiň 330-dan gowrak güman edilýän ýagdaýy anyklanyldy, onlarça adam ýogaldy.
BSGG-niň habar bermegine görä, keseliň ýaýramagy Bundibugio wirusy (Ebola wirusynyň bir görnüşi, Ugandanyň günbataryndaky Bundibugio okrugynyň hatyrasyna şeýle atlandyryldy) sebäpli ýüze çykdy. Gurama dörän ýagdaýyň COVID-19-yň derejesindäki pandemiýa ölçeglerine gabat gelmeýändigini, şonuň üçin hem halkara serhetleri ýapmak barada maslahat berilmändigini belledi. Şol bir wagtda wirusyň Kongo bilen goňşy bolan ýurtlara ýaýramak howpy ýokary diýlip bahalandyrylýar.
BMG-niň saglygy goraýyş meseleleri boýunça agentliginiň beýanatynda aýdylmagyna görä, Kongonyň Ituri welaýatynda azyndan üç sany sebitde, şol sanda welaýatyň merkezi Buniýa şäherinde, Mongwalu we Rwampara şäherlerinde kesel sebäpli bolan diýlip güman edilýän 88 ölüm ýagdaýy, barlaghana tarapyndan tassyklanan 8 ýagdaý we 246 şübheli ýagdaý hasaba alyndy. Bu sebitlerde altyn magdanlary gazylyp alynýar.
Keselleme hadysasy keseliň ýaýran zolagynyň daşynda hem ýüze çykaryldy: ýurduň paýtagty Kinşasada Ituri welaýatyndan dolanyp gelen bir adamda kesel ýagdaýy tassyklandy.
Ugandanyň paýtagty Kampalada bolsa barlaghana tarapyndan tassyklanan iki ýagdaý hasaba alyndy, olaryň biri ölüm bilen tamamlandy. Kesellänleriň ikisi hem Kongo DR-den geldi.
BSGG Bundibugio wirusyna garşy tassyklanan hiç hili sanjymyň hem-de derman serişdeleriniň ýokdugyny mälim etdi. Mundan öň ýurtda bolup geçen epidemiýalaryň hemmesi (diňe birinden başgasy) Zair ştammy sebäpli döräpdi.
Gurama keseli tassyklanan adamlary aýratynlykda saklamagy, näsaglar bilen galtaşykda bolanlary her gün yzygiderli gözegçilikde saklamagy, ýurt içindäki syýahatlary çäklendirmegi we wirusly adamlar bilen galtaşanlaryň galtaşykdan soňky 21 günüň dowamynda halkara syýahatlara çykmagyny gadagan etmegi maslahat berdi.
Ebola gyzzyrmasy organizmiň suwuklyklary, şol sanda gan, tüýkülik, gusuk we beýleki biologik bölünip çykmalar arkaly geçýän agyr wirus keselidir.
