“The New York Times” gazeti öz habar materiallaryna gatnaşykda emeli aň tehnologiýalarynyň ulanylmagy bilen awtorlyk hukuklarynyň bozulandygy üçin OpenAI we Microsoft tehnologiýa kompaniýalaryna garşy şikaýat arzasyny berendigini habar berdi diýip, TASS belleýär.
Bu nägilelik günäkärlenýänleriň öz çat-botlaryny türgenleşdirmek üçin NYT tarapyndan döredilen “millionlarça” habar önümlerini muzdsuz ulanmagynda we munuň maglumat çeşmesi hökmünde gazet bilen bäsleşýän we onuň elinden auditoriýany alýan materiallaryň peýda bolmagyna getirýändigi bilen baglanyşyklydyr.
NYT OpenAI-den we Microsoft-dan gazetiň awtorlyk hukugy bilen goralan materiallaryny ulanýan ähli çat-bot modellerini we öwrediji maglumatlary ýok etmegi talap edýär. Şeýle-de, ol mukdary belli bolmadyk kompensasiýa garaşýar, ýöne gürrüň “milliardlarça dollar” baradadyr.
Şikaýat arzasy NYT-yň we günäkärlenýänleriň aprel aýyndan bäri alyp barýan gepleşiklerindäki petigiň netijesi boldy. Gepleşikler arkaly täjirçilik şertnamasyny baglaşmak we emeli aň önümlerine degişli tehnologiki çäklendirmeler barada ylalaşmak göz öňünde tutulypdy.
