Türkmenistanyň Prezidenti Serdar Berdimuhamedow Azerbaýjanyň Prezidenti Ilham Aliýewe doglan güni mynasybetli gutlag hatyny iberdi. Gutlagyň teksti Azerbaýjanyň ýolbaşçysynyň saýtynda ýerleşdirildi.
Serdar Berdimuhamedow “Türkmenistan bilen Azerbaýjan Respublikasynyň arasyndaky çuň we köpden bäri dowam edip gelýän dostluk gatnaşyklarynyň yzygiderli ösjekdigine we halklarymyz hem ýurtlarymyz üçin bähbitli boljakdygyna” ynam bildirdi.
“Bu ajaýyp pursatdan peýdalanyp, gadyrly Ilham Geýdar ogly, Size çyn ýürekden berk jan-saglyk, bagt we maşgala abadançylygyny, Azerbaýjanyň doganlyk halkyna bolsa parahatçylyk, mundan beýläk-de ösüş we rowaçlyk arzuw edýärin” – diýlip, gutlag hatynda bellenilýär.
Türkmen halkynyň Milli Lideri, Halk Maslahatynyň başlygy Gurbanguly Berdimuhamedow hem Ilham Aliýewi doglan güni mynasybetli gutlady.
“Siziň Türkmenistan bilen Azerbaýjan Respublikasynyň arasyndaky ikitaraplaýyn gatnaşyklary berkitmäge we ösdürmäge goşýan goşandyňyz we berýän aýratyn ünsüňiz üçin minnetdarlyk bildirmek isleýärin” – diýmek bilen, Gurbanguly Berdimuhamedow Ilham Aliýewe berk jan-saglyk, bagt we ähli işlerinde üstünlikleri arzuw etdi.
