1-nji maýda Türkmenistanyň Türkiýedäki ilçisi Mekan Işangulyýew Türkiýe Respublikasynyň Palatalar we biržalar birleşiginiň başlygy Rifat Hisarjyklyoglu bilen duşuşyk geçirdi. Taraplar söwda-ykdysady hyzmatdaşlygy giňeltmegiň geljegini ara alyp maslahatlaşdy.
Duşuşygyň dowamynda häzirki zaman şertlerini nazara almak bilen, ikitaraplaýyn özara gatnaşyklary mundan beýläk-de ösdürmek we işewürlik gatnaşyklaryny diwersifikasiýalaşdyrmak barada pikir alşyldy. Hyzmatdaşlygyň dürli ugurlary boýunça bilelikdäki taslamalary amala aşyrmaga aýratyn üns berildi.
Özara söwda dolanyşygynyň möçberini artdyrmak we iki ýurduň telekeçilik düzümleriniň arasyndaky gatnaşyklary işjeňleşdirmek üçin uly mümkinçilikleriň bardygy bellenildi.
Ykdysady hyzmatdaşlyk boýunça Hökümetara türkmen-türk toparynyň we Türkmen-türk işewürler geňeşiniň işi barada bellenildi. Şeýle hem, degişli ugurlar boýunça sergileriň we bilelikdäki işewürlik forumlarynyň geçirilmeginiň gatnaşyklary ösdürmekde möhüm ähmiýete eýedigi nygtaldy.
