20-nji dekabrda rus tarapynyň başlangyjy bilen Türkmenistanyň Halk Maslahatynyň Başlygy Gurbanguly Berdimuhamedow bilen Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenkonyň arasynda telefon arkaly söhbetdeşlik boldy. Bu barada «Watan» habarlar gepleşiginde habar berildi.
Türkmen halkynyň Milli Lideri ilki bilen Russiýanyň Federal Ýygnagynyň döredilmeginiň we RF-niň Konstitusiýasynyň kabul edilmeginiň 30 ýyllygy mynasybetli gutlaglaryny beýan etdi, şeýle hem Walentina Matwiýenkony Garaşsyz Döwletleriň Arkalaşygyna gatnaşyjy döwletleriň Parlament Assambleýasynyň geňeşiniň Başlygy wezipesine täzeden saýlanylmagy bilen gutlady.
Öz gezeginde Russiýanyň Parlamentiniň ýokarky palatasynyň Başlygy türkmen halkynyň Milli Lideriniň garaýşyny tutuşlygyna goldap, rus tarapynyň iki ýurduň strategik hyzmatdaşlygyny mundan beýläk-de çuňlaşdyrmaga berk ygrarlydygyna ynandyrdy.
Mälim bolşy ýaly, häzirki wagtda Russiýa özüniň syýasy durmuşynda jogapkärçilikli döwri başdan geçirýär.
Geljek ýylyň mart aýynda geçiriljek döwlet Baştutanynyň saýlawlary döwletiň we jemgyýetiň öňünde durýan wajyp meseleleri çözmäge gönükdirilen syýasy, ykdysady, durmuş özgertmeleri amala aşyrmakda möhüm tapgyr bolar.
Russiýanyň köp milletli halkynyň dogry taryhy çözgüdi kabul etjekdigine we şunuň bilen rus halkynyň köp nesilleriniň uzakmöhletleýin geljege ykbalyny kesgitlejekdigine ynam bildirildi.
Ikitaraplaýyn gatnaşyklar barada aýdylanda bolsa, söwda-ykdysady hyzmatdaşlygy we medeni-durmuş ulgamda bilelikdäki işleri ösdürmegiň zerurdygy bellenildi.
Şunda türkmen-rus hökümetara toparyna möhüm orun degişlidir. Şol toparyň nobatdaky mejlisi geljek ýylyň başynda Aşgabatda geçiriler. Mejlisiň dowamynda ykdysadyýetde, bilimde, ylymda we beýleki pudaklarda ikitaraplaýyn gatnaşyklaryň mümkinçiligini ulanmak bilen baglanyşykly meseleleriň uly toplumy ara alnyp maslahatlaşylar.
