17-nji noýabrda Prezident Serdar Berdimuhamedow Özbegistan Respublikasynyň daşary işler ministri Bahtiýor Saidowy kabul etdi. Bu barada «Watan» habarlar gepleşiginde habar berildi.
Serdar Berdimuhamedow Özbegistanyň wekiliýetiniň şu gezekki saparynyň netijeli boljakdygyna ynam bildirdi, saparyň dowamynda taraplar ikitaraplaýyn hyzmatdaşlygyň möhüm meseleleri boýunça pikir alşarlar.
Özbegistan Respublikasy Türkmenistanyň ýakyn goňşusydyr we strategik hyzmatdaşydyr. Biz dostlukly gatnaşyklary ösdürmek bilen, hemişe asyrlaryň dowamynda emele gelen dost-doganlyk hem-de özara düşünişmek ýörelgelerine daýanýarys diýip, döwlet Baştutany aýtdy.
Taraplar oňyn ýagdaýda geçen duşuşygyň barşynda milli bähbitleri hasaba almak bilen, deňhukuklylyk hem-de özara bähbit esasynda guralýan döwletara dialogynyň okgunly ösdürilýändigini kanagatlanma bilen bellediler.
Nygtalyşy ýaly, köpugurly hyzmatdaşlygyň gün tertibinde söwda-ykdysady gatnaşyklara aýratyn ähmiýet berilýär. Ikitaraplaýyn haryt dolanyşygynyň oňyn ösüş depginini görkezýändigi kanagatlanma bilen bellenildi, ýangyç-energetika, ulag-logistika we oba hojalyk pudaklarynda hyzmatdaşlyk işjeň giňeldilýär. Iki ýurduň sebitleriniň arasynda hyzmatdaşlygyň uly kuwwatyny netijeli peýdalanmak boýunça yzygiderli işler alnyp barylýar.
