Aşgabat şäheriniň Gurtly ýaşaýyş toplumynda 30 sany 4 gatly 40 öýli we 16 sany 4 gatly 68 öýli ýaşaýyş jaýlaryny, 720 orunlyk orta mekdebi, 320 orunlyk çagalary bagyny, seýilgähi hem-de ýaşaýyş toplumyň içerki awtomobil ýollarynyň we daşarky eltiji hem-de içerki agyz suw we lagym geçiriji ulgamlaryny gurmak meýilleşdirilýär. Bu barada 10-njy noýabrda Hökümet mejlisiniň barşynda habar berildi.
«Watan» habarlar gepleşiginde bellenilip geçilişi ýaly, Aşgabady ösdürmegiň täzeçil konsepsiýasy üstünlikli durmuşa geçirilýär.
Şunuň bilen baglylykda, Prezident Serdar Berdimuhamedowyň garamagyna «Aşgabat şäherinde döwrebap binalary, desgalary we awtomobil ýollaryny gurmak hakyndaky» Kararyň taslamasy hödürlendi.
Türkmenistanyň Prezidenti bu resminamany makullap, oňa gol çekdi.
Şeýlelikde, Aşgabat şäherinde döwrebap binalary, desgalary ýerli gurluşyk kompaniýalary gurar we bu desgalaryň gurluşygyna 2023-nji ýylyň noýabr aýynda badalga berler.
Binalary, desgalary we awtomobil ýollaryny 2026-njy ýylyň sentýabr aýynda ulanmaga doly taýýar edip tabşyrmak bellenildi.
