1-nji noýabrda Prezident Serdar Berdimuhamedow «Merkezi Aziýa – Koreýa Respublikasy» 16-njy Hyzmatdaşlyk forumyna gatnaşmak üçin paýtagtymyza gelen Täjigistan Respublikasynyň daşary işler ministri Sirojiddin Muhriddini kabul etdi.
Döwlet Baştutany we Täjigistanyň daşary işler ministri ikitaraplaýyn gatnaşyklaryň meselelerine degip geçmek bilen, biziň ýurtlarymyzyň arasyndaky hyzmatdaşlygyň deňhukuklylyk, birek-birege hormat goýmak hem-de ynanyşmak ýörelgelerine esaslanýandygyny bellediler.
Duşuşygyň dowamynda iki ýurduň halkara giňişliginde hyzmatdaşlygyň oňyn häsiýeti kanagatlanma bilen nygtaldy. Hususan-da, iri halkara guramalarynyň hem-de köptaraplaýyn formatlaryň çäklerinde netijeli hyzmatdaşlygyň ýola goýlandygy bellenildi.
Ýokary depginde ösdürilýän söwda-ykdysady, medeni we ylym-bilim gatnaşyklarynyň ýokary derejesini nygtap, döwlet Baştutany Türkmenistanyň geljekde hem iki doganlyk halkyň bähbidine Täjigistan Respublikasy bilen oňyn hyzmatdaşlygy ösdürmäge ygrarlydygyny tassyklady.
