Arkadag şäherinde dermanhanalar ilata gije-gündiziň dowamynda arakesmesiz we dynç günsüz hyzmat edýärler. Bu barada «Arkadag» gazetinde habar berilýär.
Täze şäherdäki dermanhanalarda ýurdumyzda öndürilýän we daşary ýurtlaryň öňdebaryjy önüm öndürijileriniň köp görnüşli derman serişdeleri, bereketli türkmen topragynda bitýän dermanlyk ösümlikleri elýeterli bahalardan müşderilere hödürlenýär. Olaryň hatarynda dermannama boýunça, 50 göterim ýeňillikli, mugt goýberilýän derman serişdeleri hem bar. Baş dermanhana birleşiginiň garamagyndaky bu dermanhanalarda ilata hödürlenýän derman serişdeleri dünýä standartlaryna doly laýyk gelýär. Dermanhanalaryň bir gatly binalarynda müşderiler üçin niýetlenen giň we oňaýly söwda zaly, derman serişdeleriniň bölümleri, ammar jaýy göz öňünde tutulypdyr.
Satyn alnan harytlar üçin nagt we nagt däl görnüşinde hasaplaşyklary geçirip bolýar.
