Ýaponiýanyň Saglygy goraýyş, zähmet we sosial üpjünçilik ministrligi (MHLW) Alsgeýmer keseliniň Ýaponiýanyň Eisai derman serişdeleri kompaniýasy we ABŞ-nyň Biogen Inc. şereketi tarapyndan işlenip taýýarlanan dermanynyň öndürilmegini we satylmagyny tassyklady. Bu barada ýapon işläp taýýarlaýjysynyň web sahypasynda habar berildi.
Leqembi diýlip atlandyrylýan bu derman Alsgeýmer keseliniň esasy sebäbini şol bir wagtda bejermek we alamatlarynyň ösüşini haýallatmak üçin Ýaponiýada ilkinji derman serişdesi bolar. Ol eýýäm üstümizdäki ýylda ýaponiýalylar üçin elýeterli bolar diýlip garaşylýar.
“Alsgeýmer keselini bejermegiň taryhynda täze sahypa açdyk. Leqembi-ni adamlara keseliniň irki döwründe ýetirmäge, şeýle hem olaryň aladasyny etjek we seretjek hossarlaryny, ýakynlaryny üpjün etmäge borçlanýarys "- diýip, Eisai-niň baş direktory Haruo Haito öz beýanatynda aýtdy.
Kompaniýada düşündirişlerine görä, kliniki synaglar täze dermany kabul eden synaga gatnaşyjylarda (ýadyň ýaramazlaşmagy we diliň çolaşmagy), plasebo alanlar bilen deňeşdirilende, alamatlaryň ösüşiniň 27% haýallaýandygyny görkezdi. Bu derman 18 aýlap synagdan geçirildi we 50 ýaşdan 90 ýaş aralygyndaky irki döwür keseli bolan (aňyň bozulmagy ýa-da ýeňil demensiýa) näsaglary öz içine aldy. Gözlegiň jikme-jiklikleri we dermany kabul etmegiň zyýanly täsirleri alymlar tarapyndan The New England Medicine Journal of Medicine žurnalynda beýan edildi.
Şu ýylyň iýul aýynda bu derman ABŞ-nyň häkimiýetleri tarapyndan tassyklandy hem-de Amerikanyň Azyk we derman serişdelerine gözegçilik müdirligi (FDA) tarapyndan täze dermany ulanmaga rugsat berildi.
