Prezident Serdar Berdimuhamedow we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Täjigistan Respublikasynyň Prezidenti Emomali Rahmona we ýurduň ähli doganlyk halkyna Täjigistan Respublikasynyň Garaşsyzlyk güni mynasybetli tüýs ýürekden gutlaglaryny hem-de iň gowy arzuwlaryny iberdiler.
«Täjigistan Respublikasy syýasy-jemgyýetçilik durmuşynyň ähli ugurlarynda uly üstünlikleri gazandy, ykdysady ösüşde täze sepgitlere ýetdi, şeýle hem halkara giňişlikde at-abraýyny yzygiderli ýokarlandyrdy. Türkmenistan Täjigistan Respublikasy bilen ikitaraplaýyn gatnaşyklaryň mundan beýläk-de giňeldilmegine we ösdürilmegine uly ähmiýet berýär. Biziň ýurtlarymyzyň syýasy-diplomatik, söwda-ykdysady, medeni-ynsanperwer we beýleki ugurlarda alyp barýan işlerini üstünlikli utgaşdyrýandygyny bellemek ýakymlydyr» diýip, döwlet Baştutany gutlagynda belledi hem-de bilelikdäki tagallalar netijesinde ikitaraplaýyn hyzmatdaşlygyň doganlyk halklaryň bähbidine mundan beýläk-de ösdüriljekdigine we çuňlaşdyryljakdygyna berk ynam bildirdi.
«Garaşsyzlyk ýyllary içinde Siziň baştutanlygyňyzda ýurduňyzyň syýasy we ykdysady durmuşynda uly üstünlikler gazanyldy, halkara giňişlikde amala aşyrylýan netijeli işleriňiz bolsa Täjigistan Respublikasynyň abraýyny belende göterdi. Biziň ýurtlarymyzyň giň ugurlar boýunça üstünlikli hyzmatdaşlygyny aýdyň görkezýän ikitaraplaýyn gatnaşyklaryň ýokary derejesini bellemek guwandyryjydyr” diýip, Türkmenistanyň Halk Maslahatynyň Başlygy gutlagynda belledi.
