Şu gün, 5-nji sentýabrda Prezident Serdar Berdimuhamedow Ýaponiýanyň Sukuba uniwersitetiniň prezidenti Kýosuke Nagatany kabul etdi. Bu barada «Watan» habarlar gepleşiginde habar berildi.
Duşuşygyň dowamynda ylym we bilim ulgamynda däp bolan türkmen-ýapon gatnaşyklaryny pugtalandyrmak üçin açylýan giň mümkinçilikler ara alyp maslahatlaşmagyň esasy meseleleriniň biri boldy. Ýurtlaryň ikisi hem bu ulgamy kämilleşdirmäge hemmetaraplaýyn ösüşiniň möhüm şerti hökmünde garaýarlar.
Biz bilim ulgamyny kämilleşdirmekde halkara tejribesiniň we gazananlarynyň ulanylmagyna aýratyn ähmiýet berýäris diýip, Prezident Serdar Berdimuhamedow aýtdy we Türkmenistan bilen Ýaponiýanyň arasynda ylym-bilim babatda ýola goýlan hyzmatdaşlygyň netijeli häsiýetini aýratyn belledi.
Türkmen ýaşlarynyň Ýaponiýada bilim almagy, ýurdumyzyň birnäçe orta we ýokary okuw mekdeplerinde ýapon diliniň öwredilmegi, ylym-bilim wekilleriniň gatnaşyklary muňa mysal bolup durýar.
