Şu gün — 12-nji awgustda «Awaza» milli syýahatçylyk zolagynda «Hazar deňzi — parahatçylyk we dostluk deňzi» atly ylmy-amaly maslahaty öz işine başlaýar. Türkmenistanyň Prezidenti Serdar Berdimuhamedow mashata gatnaşyjylara gutlag iberdi.
«Türkmenistan Hazarýaka sebitde bolup geçýän ähli möhüm hereketlere işjeň gatnaşyjy bolmak bilen, bu ugurda parahatçylyga, ylalaşyga, özara ynanyşmaga we netijeli halkara hyzmatdaşlyga ygrarlydygyny aýdyň görkezýär. Mälim bolşy ýaly, biziň ýurdumyz Hazarýaka döwletleriň öňünde duran ähli wajyp meseleleri bilelikde ara alyp maslahatlaşmak maksady bilen, 2002-nji ýylda Aşgabatda birinji Hazar sammitini geçirdi. Bu taryhy waka Hazar gün tertibiniň ähli ugurlary boýunça uzak möhletleýin geljek üçin yzygiderli hyzmatdaşlygyň berk binýadyny goýdy hem-de Hazarda özara arkalaşykly hereket etmek üçin köp sanly meseleleriň çözülmegine uly badalga berdi» diýlip Gutlagda aýdylýar.
Maslahata Türkmenistanyň Daşky gurşawy goramak ministrliginiň ýolbaşçylary, Azerbaýjanyň, Eýranyň, Gazagystanyň, Russiýa Federasiýasynyň, şeýle hem Gruziýanyň we Rumyniýanyň diplomatik wekilhanalarynyň wekilleri gatnaşýar.
Maslahatyň barşynda sebitiň döwletleriniň HAzar deňzi sebitinde mundan beýläkki özara gatnaşyklary, şol sanda ekologiýa, geostrategiki, ykdysady we ulag ulgamlarynda gatnaşyklar bilen bagly ileri tutulýan meseleler ara alnyp maslahatlaşylar.
