Şu gün, 19-njy iýunda Prezident Serdar Berdimuhamedow oba hojalyk toplumynda hem-de welaýatlarda alnyp barylýan işleriň barşy bilen bagly meselelere bagyşlanan nobatdaky iş maslahatyny geçirdi. Oňa obasenagat toplumyna gözegçilik edýän wise-premýer A.Ýazmyradow hem-de welaýatlaryň häkimleri gatnaşdy.
Maslahatyň barşynda häkimler we wise-premýer welaýatlarda möwsümleýin oba hojalyk işleriniň alnyp barlyşy barada hasabat berdiler.
Bellenilişi ýaly, şu günler welaýatlarda galla oragy dowam edýär. Şunda degişli düzümler sazlaşykly işledilýär hem-de orakdan boşan meýdanlarda sürüm işleri geçirilýär.
Şu ýylyň pagta hasyly üçin gowaça ekilen meýdanlarda ideg işleri agrotehnikanyň talaplaryny berjaý etmek arkaly ýerine ýetirilýär.
Serdar Berdimuhamedow häzirki wagtda dowam edýän möwsümleýin oba hojalyk işleriniň talabalaýyk alnyp barlyşyna jogapkärçilikli çemeleşmegiň möhümdigini belledi we şunuň bilen baglylykda, galla oragynyň ýokary hilli we bökdençsiz geçirilmegini, bugdaýdan boşan meýdanlaryň sürlüp, möwsüme taýýar edilmegini, gowaça ideg işleriniň agrotehnikanyň kadalaryny berk berjaý etmek arkaly ýerine ýetirilmegini gözegçilikde saklamagy tabşyrdy.
