8-nji iýunda Türkmenistanyň Daşary işler ministri Raşid Meredowyň BMG-niň Türkmenistandaky agentlikleriniň hem-de bu guramanyň sebitleýin düzümleriniň ýolbaşçylary bilen wideoaragatnaşyk arkaly duşuşygy geçirildi. Bu barada Türkmenistanyň DIM-i habar berýär.
Duşuşyga BMG-niň Ösüşi utgaşdyrmak boýunça sebitleýin merkeziniň (UNDCO) Ýewropa we Merkezi Aziýa boýunça başlygy hanym G.Ýop Son, ÝUNESKO-nyň Tährandaky Klaster edarasynyň direktory hanym G.El Huri, BMG-niň bosgunlaryň işleri boýunça Ýokary Komissarynyň müdirliginiň Merkezi Aziýa boýunça sebit wekili H.Fridrih Şodder, BMG-niň Tebigy betbagtçylyklaryň töwekgelçiligini azaltmak boýunça Ýewropa sebiti boýunça wekili A.Muhidow, BMG-niň Türkmenistandaky hemişelik utgaşdyryjysy D.Şlapaçenko we UNDP, UNODC, UNFPA, UNICEF, BSGG, şol sanda BMG-niň Merkezi Aziýa üçin öňüni alyş diplomatiýasy boýunça Sebitleýin Merkezi ýaly Türkmenistandaky wekilhanalaryň ýokary derejeli wekilleri gatnaşdylar.
Duşuşygyň dowamynda taraplar Türkmenistan bilen Birleşen Milletler Guramasynyň arasyndaky işjeň hyzmatdaşlygyň çägindäki köp sanly meseleleriň üstünde durup geçdiler.
Gepleşikleriň dowamynda türkmen tarapy hyzmatdaşlygyň täze ugurlaryny döretmek mümkinçiligine seretmegi teklip etdi. Hususan-da, BMG bilen hyzmatdaşlygy giňeltmäge, guramanyň we gurluşlarynyň Türkmenistandaky wekilçiligini artdyrmaga taýýardyklary mälim edildi. Bu ugurda bellenen mowzuklar boýunça alnyp barylýan işlere aýratyn üns berildi.
BMG-niň bölümleriniň ýolbaşçylary öz çykyşlarynda Türkmenistanyň Hökümeti bilen alnyp barylýan bilelikdäki işler barada habar berdiler, türkmen tarapynyň gatnaşyklaryň täze ugurlaryny gözlemek baradaky tekliplerini goldadylar we bu ugurda pikirleri we teklipleri bilen paýlaşdylar.
