8-nji iýunda Aşgabada iki günlük resmi sapar bilen gelen Wengriýanyň Premýer-ministri Wiktor Orban günüň ikinji ýarymynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow bilen duşuşdy.
Ynanyşmak, netijelilik ýagdaýynda geçen söhbetdeşligiň barşynda Türkmenistanyň Halk Maslahatynyň Başlygy we dostlukly ýurduň Hökümetiniň baştutany özara gyzyklanma bildirilýän giň ugurlar boýunça türkmen-wenger hyzmatdaşlygynyň häzirki ýagdaýy we ony mundan beýläk-de ösdürmegiň geljegi barada pikir alyşdylar.
Duşuşygyň dowamynda aýry-aýry möhüm ugurlara aýratyn üns berildi.
Dünýäde bolup geçýän düýpli özgerişlikleriň häzirki döwründe çylşyrymly ählumumy wehimleri hem-de sebit meselelerini çözmekde her bir döwletiň pikirini nazara almak wajypdyr diýip, Gurbanguly Berdimuhamedow aýtdy.
Söwda-ykdysady ulgam türkmen-wenger hyzmatdaşlygynyň ikinji möhüm ugry hökmünde kesgitlenildi. Söwda, energetika, senagat kooperasiýasy, logistika, oba hojalygy we hususy ulgam geljegi uly ugurlaryň hatarynda görkezildi.
Duşuşyk tamamlanandan soň, kaşaň «Arkadag» myhmanhanasynda Türkmenistanyň Halk Maslahatynyň Başlygy Gurbanguly Berdimuhamedowyň we Wengriýanyň Premýer-ministri Wiktor Orbanyň gatnaşmagynda belent mertebeli myhmanyň hormatyna agşamlyk nahar berildi.
Wengriýanyň Hökümetiniň baştutanynyň Türkmenistana resmi sapary dowam edýär.
Garaşylyşy ýaly, ertir Aşgabatda geçiriljek türkmen-wenger gepleşikleriniň barşynda meseleleriň giň ugurlary ara alnyp maslahatlaşylar we köptaraply hyzmatdaşlygy ösdürmäge, iki doganlyk döwletiň we olaryň dostlukly halklarynyň arasyndaky ynanyşmagy we özara düşünişmegi mundan beýläk-de pugtalandyrmaga gönükdirilen möhüm ikitaraplaýyn resminamalaryň birnäçesine gol çekiler.
