Tesla-nyň Model S Plaid elektrokary dünýädäki iň çylşyrymly ýaryş ýollarynyň biri bolan Nýurburgringde täze aýlaw rekordyny goýdy. Bu barada “Electrek” neşirine salgylanyp, gazeta.ru habar berýär.
Model S Plaid iň gowy aýlawyny 7 minut 25,2 sekuntda geçdi. Bu netije elektrokarlaryň arasynda Porsche Taycan Turbo S tarapyndan goýlan öňki rekorddan 8 sekunt tapawut edýär.
Tesla şeýle haýran galdyryjy netijäni ýörite sazlamalaryň we Track Package detallarynyň kömegi bilen gazandy. Oňa Zero-G diskleri, Goodyear Supercar 3R şinalary, şeýle-de karbon-keramiki tormoz girýär. Tesla Track Package-i 2023-nji ýylyň maý aýynda çykardy.
Onuň kömegi bilen öndüriji awtomobile sagatda 322 km çenli bat almaga mümkinçilik berýän sazlamalary açmagy başardy. Ilkibaşda Model S Plaid-iň iň ýokary tizligi howpsuzlyk sebäpli sagatda 262 km tizliginde blokirlenipdi.
Nýurburgringiň umumy sanawynda Model S Plaid häzir dokuzynjy orny eýeleýär. Häzirki wagtda ýoluň reýtinginde birinji orun Mercedes-AMG One giperkaryna degişli.
