10-njy maýda Täjigistanda döwlet saparynda bolýan Prezident Serdar Berdimuhamedow Hökümet kabulhanasynda Täjigistan Respublikasynyň Oli Majlisiniň Namoýandagon Majlisiniň başlygy Mahmadtoir Zokirzoda bilen duşuşdy.
Duşuşygyň dowamynda iki ýurduň parlamentleriniň ugry boýunça hyzmatdaşlygyň halkara ugruna aýratyn üns berildi. Şunuň bilen baglylykda, dürli ulgamlarda iki döwletiň oňyn başlangyçlaryny ilerletmek üçin türkmen we täjik parlamentarileriniň Parlamentara birleşiginiň, ÝHHG-niň we GDA-nyň Parlamentara assambleýalarynyň, beýleki halkara we sebit düzümleriniň meýdançalaryny netijeli peýdalanmaklarynyň uly mümkinçilikleriniň bardygy bellenildi.
Bilelikdäki işiň şeýle görnüşleriniň türkmen we täjik deputatlarynyň tejribelerini baýlaşdyrmaga, kanun döredijilik hem-de hukuk ulanyş iş tejribesini kämilleşdirmekde täzeçil başlangyçlary durmuşa geçirmek üçin olara goşmaça mümkinçilikleri berjekdigi bellenildi.
Şol birwagtyň özünde Türkmenistanyň Mejlisiniň hem-de Täjigistan Respublikasynyň Oli Majlisiniň wekiliýetleriniň özara saparlarynyň guralmagynyň, bilelikdäki duşuşyklaryň, “tegelek stollaryň”, okuw maslahatlarynyň geçirilmeginiň hem iki ýurduň deputatlarynyň arasynda dostlukly, özara peýdaly gatnaşyklaryň berkidilmegine ýardam etjekdigi nygtaldy.
