3-nji aprelde wideoaragatnaşyk ulgamy arkaly Hindistanyň we Merkezi Aziýa ýurtlarynyň medeniýet ministrleriniň duşuşygy geçirildi. Hindistanyň medeniýet ministri Kişan Reddiniň ýolbaşçylygyndaky sessiýada Türkmenistana ministr Atageldi Şamyradow wekilçilik etdi diýip, Orient agentligi habar berýär.
2022-nji ýylyň 27-nji ýanwarynda geçirilen Hindistan — Merkezi Aziýa sammitinde bu alty ýurduň liderleri asyrlarboýy dowam edýän medeni gatnaşyklary berkitmek hem-de özara düşünişmek üçin medeni aragatnaşyga has ýakyndan ýardam etmegi karar etdiler. Geçirilen duşuşykda ministrler bu karary ilerletmek boýunça garaýyşlaryny paýlaşdylar. Taraplar sammite gatnaşyjy ýurtlaryň her biriniň medeni gymmatlyklaryny aýratynlykda hem-de bilelikde açyp görkezjek maksatnamany işläp düzmekligi ylalaşdylar.
Duşuşygyň ahyrynda hindi tarapy ministrleriň Bilelikdäki beýanyny hödürledi. Gatnaşyjylar ony mümkin boldugyndan tiz wagtda tassyklamaklygy we şular ýaly duşuşyklary yzygiderli geçirip durmagy ylalaşdylar.
