Şu gün, 24-nji martda Prezident Serdar Berdimuhamedow öňde boljak Türkmenistanyň Mejlisiniň saýlawlarynda GDA-nyň Synçylar toparyna ýolbaşçylyk edýän Garaşsyz Döwletleriň Arkalaşygynyň Baş sekretary Sergeý Lebedewi kabul etdi.
Sergeý Lebedew GDA-nyň synçylar toparynyň işi barada habar berdi hem-de halkara synçylaryň netijeli işlemegi üçin ähli zerur şertleriň döredilendigini nygtady.
Duşuşygyň dowamynda Serdar Berdimuhamedow hem-de GDA-nyň Baş sekretary Arkalaşygyň çäklerindäki hyzmatdaşlygyň ileri tutulýan meselelerini ara alyp maslahatlaşdylar hem-de däp bolan dostlukly döwletara hyzmatdaşlygynyň okgunly häsiýete eýedigini kanagatlanma bilen bellediler.
Arkalaşygyň döwletleriniň bar bolan uly kuwwatynyň dürli ulgamlarda özara bähbitli hyzmatdaşlygy ösdürmek üçin giň mümkinçilikleri döredýändigi nygtaldy. Ykdysadyýet we söwda, energetika, ulag, aragatnaşyk we telekommunikasiýalar, ylym-bilim hem-de medeni-ynsanperwer ulgamlary, GDA-nyň giňişliginde parahatçylygy, howpsuzlygy we durnuklylygy üpjün etmek işinde özara gatnaşyklary pugtalandyrmak hyzmatdaşlygyň esasy ugurlarynyň hatarynda bellenildi. Ekologiýa we daşky gurşawy goramak meselelerini çözmekde tagallalary birleşdirmek hem möhüm ugur bolup durýar.
