Şu gün, 20-nji martda Aşgabatda «Arçabil» myhmanhanasynda «Türkmenistanda syýahatçylygy ösdürmegiň esasy ugurlary we mümkinçilikleri» atly halkara maslahat öz işine başlady.
Foruma Syýahatçylyk şäherleriniň Bütindünýä federasiýasynyň, Bütindünýä mirasynyň sanawyna girizilen şäherleriň guramasynyň, şeýle hem Özbegistanyň, Gyrgyzystanyň, Hytaýyň, Belarusuň, Horwatiýanyň, Bolgariýanyň, ABŞ-nyň, Türkiýäniň, Russiýanyň, Eýranyň syýahatçylyk kärhanalarynyň wekilleri gatnaşýar.
Maslahatyň işini şöhlelendirmek üçin ýurdumyzyň habar beriş serişdeleriniň wekilleri, şol sanda TmCars.info-nyň habarçylary gatnaşdy.
Forumyň barşynda Bolgariýanyň «Augusta» şypahana we myhmanhana toplumynyň baş direktory, «Bagtyýar dostlar», «Owadan syýahat» HK-larynyň direktorlary, Özbegistanyň «Asia Adventures» kompaniýasynyň wekili, HHR-iň «Shanghai Intercontinental» syýahatçylyk kompaniýasynyň direktory, Horwatiýanyň «Pointer travel DMC» kompaniýasynyň wekili we beýlekiler çykyş etdiler.
Günüň ikinji ýarymynda halkara maslahatyna gatnaşyjylar Köne Nusaý galasyna, Türkmenistanyň Döwlet medeniýet merkeziniň Döwlet muzeýine, Türkmen halysynyň milli muzeýine baryp görerler.
Ertir, 21-nji martda halkara maslahatyna gatnaşyjylar Milli bahar baýramy — Halkara Nowruz güni mynasybetli Ahal welaýatynyň Ak bugdaý etrabynyň çäginde Nowruz ýaýlasynda geçiriljek dabaralara gatnaşarlar.
22-nji martda daşary ýurtly myhmanlar Türkmenbaşy şäherine baryp, Hazar deňzinde gämide gezelenç ederler. «Awaza» milli syýahatçylyk zolagyndaky «Berkarar» myhmanhanasynyň mejlisler zalynda halkara maslahatyň ýapylyş dabarasy bolar.
