Adam başyna 130 müň dollar. Dünýädäki iň gymmat syýahat üçin petekleriň bahasy hut şeýle. Türkmenistanda iki ýer — Aşgabat bilen Merw (Mary) bolsa syýahatçylaryň şeýle köp pul töläp baryp görjek ýerleriniň sanawyna girdi.
Bu ugur 2024-nji ýyla meýilleşdirilen bolsa-da, 2023-nji ýylyň başyndaky ýagdaýa görä, baha babatda «dünýäde 1-nji syýahat» hökmünde hasaplanylýar. Ony baý adamlar üçin niýetlenen syýahatlar bilen meşgullanýan Amerikanyň TCS World Travel kompaniýasy guraýar. Kompaniýa hususy uçarlary ulanyp, dünýäniň dürli künjeklerinde syýahat ugurlarynda ýöriteleşýär diýip, ORIENT agentligi habar berýär.
Kaşaň ugur "Patyşalyklar we medeniýetler" diýip atlandyrylýar we salgylanylýan çeşmä laýyklykda, 2024-nji ýylyň 13-nji iýunyndan 2-nji iýuly aralygynda hereket eder.
Şeýle hem kompaniýa bu syýahata goşulmak isleýänler üçin bahany mälim etdi. "Patyşalyklar we medeniýetler" syýahatyna gatnaşmak isleýän adam, takmynan, 129 müň 950 dollar tölemeli bolar. Hemme zady öz içine alýan ekspedisiýanyň bahasyna şular girýär: hususy uçarda uçmak, myhmanhanalarda, ýerüsti ulagda we nahardan başlap, gündelik çäreleriň ählisi.
Tutuş syýahat 20 gün dowam edip, London (Angliýa), Kotor aýlagy (Çernogoriýa), Krakow (Polşa), Buharest we Suçaw (Rumyniýa), Buhara (Özbegistan), Tbilisi (Gruziýa), Aşgabat we Merw (Türkmenistan), Efes we Mawy kenar (Türkiýe) ýaly birnäçe ýurtda barmaly ýerleri öz içine alýar.
Syýahatçylary gatnatmak 52 orunlyk Airbus A321neo-LR kompaniýasynyň kaşaň uçary bilen amala aşyrylar.
