3-nji martda Türkmenistanyň Halk Maslahatynyň Başlygy Gurbanguly Berdimuhamedow bilen Türkiýe Respublikasynyň Beýik Millet Mejlisiniň Başlygy Mustafa Şentopyň arasynda telefon arkaly söhbetdeşlik geçirildi.
Telefon söhbetdeşliginiň dowamynda taraplar iki ýurduň arasynda barha ösdürilýän dost-doganlyk gatnaşyklarynyň ýokary derejesini kanagatlanma bilen belläp, syýasy ulgamda strategik hyzmatdaşlygyň durnukly häsiýetini aýratyn nygtadylar.
Şunuň bilen baglylykda, Türkiýäniň Beýik Millet Mejlisiniň ýolbaşçysy sebit we ählumumy meselelerinde netijeli kadalaşdyryjy gural bolup çykyş edýän parlament diplomatiýasynyň möhüm ornuna ünsi çekdi we pursatdan peýdalanyp, Gurbanguly Berdimuhamedowy ýakyn wagtda geçirilmegi meýilleşdirilen parlamentara çärelere gatnaşmaga çagyrdy.
Türkiýe Respublikasy Türkmenistanyň esasy söwda hyzmatdaşlarynyň biri bolup durýar. Halk Maslahatynyň Başlygy şular barada aýtmak bilen, ykdysadyýetiň energetika, ulag we kommunikasiýalar, maýa goýumlar, söwda, oba hojalygy, dokma senagaty, gaýtadan işleýän we nebithimiýa senagaty ýaly pudaklarynda we beýleki ugurlarda anyk taslamalary durmuşa geçirmegi teklip etdi.
Türkmenistanyň Halk Maslahatynyň Başlygy ikitaraplaýyn söwda-ykdysady gatnaşyklary yzygiderli ösdürmegiň çäklerinde Ykdysady hyzmatdaşlyk boýunça hökümetara türkmen-türk toparynyň öňünde durýan wezipeleriň ähmiýetini belläp, ýurdumyzyň bu toparyň nobatdaky 7-nji mejlisini, şeýle-de Türkmen-türk işewürlik maslahatyny geçirmäge taýýardygyny nygtady.
Söhbetdeşligiň barşynda döwletara gatnaşyklaryň esasy ugurlarynyň biri bolan ylym-bilim ulgamyndaky hyzmatdaşlyk barada-da durlup geçildi.
