1-nji martda Prezident Serdar Berdimuhamedow «Wozroždeniýe» taslama-gurluşyk kompaniýalar toparynyň ýolbaşçysy Igor Bukatony kabul etdi.
Duşuşygyň dowamynda dürli ulgamlarda uly kuwwata eýe bolan hyzmatdaşlygyň ileri tutulýan ugurlary boýunça pikir alşyldy.
Şunuň bilen baglylykda, özara bähbitli ikitaraplaýyn hyzmatdaşlygyň mundan beýläk-de giňeldilmegine meýil beýan edildi.
Bellenilişi ýaly, Türkmenistan howanyň üýtgemeginiň ýetirýän täsirlerini peseltmek boýunça netijeli çäreleri yzygiderli durmuşa geçirýär, durmuş-ykdysady taslamalar amala aşyrylanda ekologiýa meselesine uly ähmiýet berýär.
Şeýle hem häzirki döwrüň ýagdaýlary bilen baglylykda, suw serişdelerini gorap saklamagyň we olary rejeli peýdalanmagyň täzeçil tehnologiýalary we ylmyň soňky gazananlaryny ulanmak arkaly ýurdumyzyň ähli derýalarynda endigan suw akymyny üpjün etmegiň möhümdigi bellenildi. Şundan ugur alyp, şu meseleleri çözmekde Türkmenistan öňdebaryjy daşary ýurt tejribesini ulanmagy maksat edinýär hem-de «Wozroždeniýe» taslama-gurluşyk kompaniýalar toparynyň anyk tekliplerine seretmäge taýýardyr.
Belläp geçsek, «Wozroždeniýe» taslama-gurluşyk kompaniýalar topary tarapyndan ýurdumyzda birnäçe möhüm infrastruktura taslamalary, şol sanda geçen ýylda ulanylmaga berlen, paýtagtymyz üçin uly ähmiýeti bolan sil suwlaryny sowujy desgalar toplumynyň taslamasy amala aşyryldy.
