Türkmenistanyň Halk Maslahatynyň Başlygy, türkmen halkynyň Milli Lideri Gurbanguly Berdimuhamedow Türkiýe Respublikasynyň Prezidenti Rejep Taýyp Ärdogana ýurduň günorta-gündogar sebitinde, Siriýa Arap Respublikasynyň Prezidenti Başar Al Asada ýurduň demirgazyk-günbatar sebitinde bolup geçen köp sanly adam pidalaryna we şikes ýetmelere hem-de weýrançylyklara getiren güýçli ýer titremesi zerarly gynanç hatyny iberdi.
Bu barada “Watan” habarlar gepleşiginde bellenilip geçildi.
Türkmenistanyň Halk Maslahatynyň Başlygy, türkmen halkynyň Milli Lideri şu agyr pursatda Türkmenistanyň Halk Maslahatynyň adyndan, şeýle hem hut öz adyndan gurban bolanlaryň dogan-garyndaşlaryna hem-de ýakynlaryna ýürekden gynanjyny we medet beriji sözlerini, ejir çekenlere bolsa tiz wagtda sagalmaklary baradaky dileglerini beýan etdi.
Türkiýäniň Hökümetiniň ýanynda Adatdan daşary ýagdaýlaryň öňüni almak we olaryň zyýanlaryna garşy göreşmek boýunça müdirligiň maglumatlaryna görä, Türkiýäniň günorta-gündogarynda bir günde 7 baldan ýokary magnitudaly iki sany ýer titreme bolup geçdi. Soňky maglumatlara görä, Türkiýäniň on sany welaýatynda 1600-den gowrak adam aradan çykdy, 11,1 müň adam şikes aldy.
Siriýada güýçli ýer titremäniň pidalarynyň sany 1 müňden geçdi.
Güýçli titremeler Idlib, Hama, Aleppo, Latakýe, Tartus we Rakka şäherlerinde ýumrulmalara getirdi.
