"Çanmi" taýfuny Ýaponiýadaky 18 awtoulag zawodynyň wagtlaýynça ýapylmagyna sebäp bolar. 3-nji iýunda "Toyota-nyň" 13 zawodynda we "Suzuki-niň" bäş zawodynda önümçilik togtadylar.
"Nikkei" neşiriniň maglumatlaryna görä, howa ýagdaýynyň erbetleşmegi eýýäm ulag gatnawynda düýpli bökdençlikleri döretdi. Ýüzlerçe howa gatnawlary ýatyryldy, binalara zeper ýetdi, azyndan dokuz adam dürli derejede şikes aldy.
Ýaponiýanyň meteorologiýa gullugy güýçli ýagyş we tupanyň boljakdygy barada duýduryş berdi. Häkimiýetler Amami sebitinde we Günbatar Ýaponiýanyň birnäçe etrabynda ýer süýşmeleriniň bolmagyndan, peslikdäki ýerleriň suw astynda galmagyndan hem-de derýalaryň kenaryndan çykyp, daşmagyndan howatyrlanýarlar.
Howa çaklamalarynyň oňyn däldigini göz öňünde tutup, "Toyota" we "Suzuki" önümçiligi wagtlaýyn togtatmagy we ýagdaý durnuklaşandan soň ony gaýtadan başlamagy makul bildiler.
Diňe Fukuoka prefekturasyndaky "Toyota Motor Kyushu" zowody muňa goşulmaýar, ol adaty tertipde işini dowam etdirer.
Sişenbe güni ertirki ýagdaýa görä, taýfun Kýusýu adasynyň günortasynda bolup, demirgazyk-gündogar ugry boýunça hereket edýärdi. Günüň ikinji ýarymynda onuň paýtagt sebitine ýetmegine we şondan soň Ýuwaş ummanynyň akwatoriýasyna çykmagyna garaşylýar.
