5-nji dekabrda Prezident Serdar Berdimuhamedow ýurdumyzyň welaýatlarynda alnyp barylýan oba hojalyk işleriniň barşy bilen baglanyşykly meselelere bagyşlanan sanly ulgam arkaly iş maslahatyny geçirdi. Maslahata Ministrler Kabinetiniň oba senagat toplumyna gözegçilik edýän orunbasary A.Ýazmyradow hem-de welaýatlaryň häkimleri gatnaşdy.
Maslahatyň dowamynda welaýatlaryň häkimleri ýerlerde dowam edýän möwsümleýin oba hojalyk işleriniň ýagdaýy, hususan-da, pagta hasylyny soňky hanasyna çenli ýygnap almak boýunça görülýän çäreler, şeýle hem halkara Bitaraplyk güni mynasybetli dabaralara taýýarlyk görlüşi barada hasabat berdiler.
Şeýle hem hasabatyň dowamynda welaýatlarda ýyladyş ulgamlarynyň kadaly işledilişiniň, elektrik energiýasy we tebigy gaz bilen üpjünçiligiň gözegçilikde saklanylyşy barada aýdyldy.
Wise-premýer A.Ýazmyradow ýurdumyzyň welaýatlarynda dowam edýän möwsümleýin oba hojalyk işleriniň barşy barada hasabat berdi.
Serdar Berdimuhamedow hasabatlary diňläp, möwsümleýin oba hojalyk işleriniň agrotehnikanyň kadalaryna laýyklykda we ýokary hilli geçirilmeginiň möhümdigini belledi.
Döwlet Baştutany pagtanyň ýetişdirilen hasylyny soňky hanasyna çenli ýygnap almak, ýygnalan hasylyň talabalaýyk saklanylmagyny we pagta arassalaýjy kärhanalarda gaýtadan işlenilmegini üpjün etmek, pagtaçy kärendeçiler bilen hasaplaşyklary öz wagtynda geçirmek, geljek ýylyň hasyly üçin gowaça ekiljek meýdanlary taýýarlamak boýunça degişli çäreleri görmegiň zerurdygyny nygtady we bu babatda wise-premýere birnäçe tabşyryklary berdi.
